Keçmiş prezident Sarkozi həbs edildi

Sarkozinin Həbsxana Yolu: Tərəfdar Alqışları və Məhbus Qışqırıqları

Fransanın paytaxtı Parisdəki evindən həyat yoldaşı Karla Bruni ilə əl-ələ çıxan 70 yaşlı Nicolas Sarkozy həbsxanaya aparılacağı avtomobilə minərkən tərəfdarlarının coşqulu alqışları ilə qarşılaşıb. Ətrafda toplaşan insanlar "Nicolas! Nicolas!" deyə şüar səsləndirib, Fransanın dövlət himnini oxuyublar. Keçmiş prezident isə bu anlarda "Bu gün köhnə bir dövlət başçısı deyil, günahsız bir adam həbsə atılır... Həqiqət zəfər çalacaq" ifadələrini işlədib.

Məhbuslardan Qəribə Qarşılanma

Bundan əlavə, AFP xəbər agentliyi qeyd edib ki, Fransanın keçmiş dövlət başçısı öz kamerasına gedərkən, digər kameralardakı məhbuslar "Xoş gəldin Sarkozy!", "Sarkozy buradadır" deyə qışqırıblar. Nicolas Sarkozy təhlükəsizlik səbəbindən digər məhbuslardan təcrid olunacaq və 11 kvadratmetrlik, pəncərəsi və televizoru olan xüsusi bir kamerada saxlanılacaq.

O, bu halda bir Avropa İttifaqı ölkəsində həbsxanaya düşən ilk keçmiş lider oldu. Sarkozy həm də 1958-ci ildən bəri Fransa tarixində həbs olunan ilk keçmiş dövlət başçısıdır. Keçmiş liderin vəkili Kristof İnqren bildirib ki, Sarkozynin gündə bir saat təkbaşına həyətə çıxmaq və həftədə üç dəfə ailəsindən qonaq qəbul etmək hüququ var. İnqren əlavə edib ki, Sarkozy həbsdə olarkən kitab yazmağı da planlaşdırır.

Həbs müddətinə etiraz edilən və azadlığa buraxılması tələb olunan Sarkozynin ən azı üç həftə həbsdə qalacağı gözlənilir. Məhkəmə, apellyasiya qərarı gözlənilmədən Sarkozynin həbsxanaya göndərilməsinə hökm vermişdi.

24 saat